Pro 7 | WSK | STEP | Aga kuriang, den ani ka manem imi gemang ningi ilukuawurko.

Proverbs 7

1 Aga kuriang, den ani ka manem imi gemang ningi ilukuawurko.
2 Ni aninga munan den ko ka manem mu karo tui, mu ni yawarakala bagerko.
Ale nika metam kema ko sinar tasam iwitatala, aninga den ninguru karo tuiko.
3 Den mu kiting kopana te se gemang motam ningi bataguru bitar se
tom suen biya anirukko.
4 Ikia nunguning mu ka koras iwita,
se ikia sinar mu ka tiran yawara bo iwita,
tom suen biya kerak pingita bagurukko.
5 Se kari bo ko imet gemang kulukua ko den ka manuk,
mu ikia nunguning se ikia sinar imitang mu ka sanguk se noko den welang mu biring tuiko.

Imet kuari ago wore kilek memek beteram ko den

6 Tom bo aninga kawam ko songkuringi daigem ale amatam kaparam se lage te loagawakasam,
7 se kari kulak lage karokasan ale nama taikasan.
Kari kulak umutang mu ikia ningo nuam bo nongote mena.
Bare nunga ningi bo suwanta mu am ikia ningo bo kote mena nunguning.
8 Se nu lage kaoram ale imet bo ko kawam kuringi tairam.
9 Mu bainga ningi, sor turom batagam taiwaram.

10 Se imet umutang lage luan imet iwita numi nungam
ale den kari mu te gomang kulukuokko mu ko iki se aratam.
11 Imet umu nu doluruk nguangurukko imet mena.
Nu kawam te ninguru me dagi bagakaso,
12 am tom suen biya lage luan karo se,
diara guruga kuwim te geraga se,
kari nunga kupu kupu geraga lagakaso.

13 Nu kulak mu iluwam yasaram ale kol misikiram,
ale me dolaram, am maonam,
14 “Ani aitakta KARI BIYA tama tuem,
se na ningo ningo nukum mu saki kawam te am aniso.
15 Se ani karkikko kawam beterem ale tairem karkem!
16 Aninga anira kuwim mu guang bala yawara ago Egypt wonong te tairam wore te muru beterem,
17 ale mel siring yawara yawara awete warem se aniso.
18 Tair se namanak ale turom awete ani se kola gusi saganak se ukirokko.
19 Aninga agari ko me nguangerko!
Nu kawam te me bagoso,
nu awar biya nunguningkiri namaram,
20 ale tairatela me tairukkowo!
Mu awuk, nu manga biyala giam ale ago namaram,
sige imi kueruk bare asele nukum te tairukko.”

21 Ale nu yasaram ilak baga se den kawel imitang te nu gomang kulukuam.
22 Se kulak mu den welang mu ikiam, mu nu tairatela kowom kaoram ilak ko kawam te namaram.
Nu bulmakau mora se kuerukko tagisan ilak namasan iwitata,
se aking madar popo luan nunga usagukko bare nuna me ko ikisan,
23 am ningi namasan se nunga usagoso iwitata.
Se aking inanganang dagarok me ko ikiso, naguso ningi nama soroso iwitata,
kulak imi nu memek taukko lage te namakaso, wore nu me ko sinar uriam.

24 Se aga kuriang alo, nedegewa tagiral ale den imi ninguru ikial ale karo tualko!
25 Imet uwuta mu ariwaral se nengemang me kulukuokko!
Se kowom karo karo me ilak geragalko!
26 Mu awuk, kari suen biya imet oworta kumik te memek to gilingiman.
27 Noko kawam ko lage mu lage kari kuera nunga nuguwim te namara wore turan.
Se nina lage mu kaoral, mu tairatela memek arigalko.